“ЗАПРАШАЕМ НА ВЯЧОРКІ”

Подробности

Опубликовано 03.01.2019 11:25

Каб стварыць умовы для паглыблення і абагульнення ведаў аб народных традыцыях сваёй Радзімы, развіць цікавасьць да абрадаў, звачаяў народа, да нацыянальнай культуры, 28 снежня ў аддзяленні дзённага знаходжання для грамадзян сталага ўзросту дзяржаўнай установы “Цэнтр сацыяльнага абслугоўвання насельніцтва Кастрычніцкага раёна г. Гродна” адбылося мерапрыемства фальклорнай накіраванасці “Запрашаем на вячоркі”.

З даўніх часоў беларускі народ славіўся сваёй працавітасцю, весялосцю і сяброўствам. Пасля цяжкага працоўнага дня людзі збіраліся на вячоркі, дзе яны весяліліся ад усёй душы, займаліся патрэбнай справай і з карысцю бавілі час.

Пажылыя грамадзяне, якія наведваюць аддзяленне, таксама вырашылі з карысцю правесці час доўгім зімовым вечарам, тым больш, што многія з іх у дзяцінстве былі на сапраўдных вячорках і памятаюць як гэта адбывалася. Георгій Блізнеускі, 1937 года нараджэння распавёў, што ў іх на вячоркі не пускалі жанчын з калаўротамі, так як яны займалі шмат месца, і жадаючыя прасці прыходзілі на вячоркі з ручным верацёнам. Мужчыны таксама не сядзелі склаўшы рукі, яны рамантавалі хатняе начынне і выразалі з дрэва. Майстрыхі гуртка рукадзелля Галіна Жывалеўская і Галіна Дудко на вячорках займаліся вязаннем, Таццяна Баўтрушова, якая наведвае курс “Азбука ведаў інфармацыйных тэхналогій” вышывала бісерам, Тамара Іванова, удзельніца групы “Краіназнаўства” вязала кручком, а сямейная пара Тамара і Мечыслаў Руткевічы пачаставалі ўсіх хатнім яблычным пірагом.

Вядучыя мерапрыемства – гаспадыня Людміла Пенталь і гаспадар-Міхаіл Аўхіменя, запрашалі прысутных разам праспяваць народныя песні, станцаваць самыя даўнія танцы і паўдзельнічаць у народных гульнях.

Для надання мерапрыемству большага каларыту, жанчыны арганізавалі перадкалядны стол з нішчымнымі стравамі (марынаваныя грыбы, квашаная капуста, салёныя гуркі, куцця, хлеб хатняга гатунку). Па традыцыі стол быў накрыты белым абрусам, а пад абрус сімвалічна пакладзена трошкі сена.

Пажылыя людзі адказна і з энтузіязмам падышлі да арганізацыі такога мерапрыемства. І яно атрымалася па-хатняму душэўна. Людзі прыемна размаўлялі, спявалі песні на беларускай, польскай і ўкраінскай мовах, танцавалі “Польку” і “Кракавяк”, распавядалі цікавыя гісторыі, дзяліліся ўспамінамі.

І кожны быў ганарлівы за багатую культурную спадчыну сваёй краіны.